|
لاہور: اسلام آباد میں پیرس کے بنے سوٹ پہننے والے ڈاکو بیٹھے ہیں , محسن پاکستان ڈاکٹر عبدالقدیر خان
لاہور(پین) محسن پاکستان ڈاکٹر عبدالقدیر خان نے کہا ہے کہ ملک کے 47فیصد نوجوان ووٹ کے ذریعے ملک کی تقدیر بدل سکتے ہیں اور ایک اچھی ،مخلص اور محب وطن قیادت کے ذریعے ملک ترقی کی راہ پر گامزن ہو سکتا ہے ملک کا دفاع ناقابل تسخیر ہے اور اب کسی کو بھی پاکستان کی طرف میلی آنکھ سے دیکھنے کی جرات بھی نہیں ہو سکتی ۔اگر کوئی ایک ایٹم بم چلانے کی کوشش کرے گا تو ہم اب دس ایٹم بم چلائیں گے ۔مغربی پروپیگینڈہ بے بنیاد ہے کہ پاکستان کا ایٹمی پروگرام محفوظ نہیں ۔جو ایٹم بم بنانا جانتے ہیں وہ اس کی حفاظت کرنا بھی جانتے ہیں۔
یہ ایٹم بم ہے کوئی مذاق نہیںیا بچوں کا کھیل نہیں ۔نوجوان نسل ووٹ کی اہمیت کو سمجھے ۔الیکشن والے دن سونے یا پکنک منانے کی بجائے مخلص ،ایماندار ،محب وطن ،تعلیم یافتہ نمائندگان کو ووٹ کاسٹ کریں ۔یہ باتیں انہوں نے گزشتہ روز سپیر ئیر یونیورسٹی میں طلبہ و طالبات سے خطاب کرتے ہوئے کہیں ۔اس موقع پر پروفیسر چوہدری عبدالخالق ،ریکٹر یونیورسٹی ڈاکٹر ظفر اقبال ،سربراہ و ڈین شعبہ ابلاغیات پروفیسر ڈاکٹر مغیث الدین شیخ ،ڈین فیکلٹی آف انجینئرنگ اینڈ ٹیکنالوجی ڈاکٹر فاروق اسلام ،پرنسپل عذرانا ہید میڈیکل کالج ڈاکٹر چوہدری اکبر ،سابق ایم این اے خورشید زمان ،عمران ملک ،فیکلٹی ممبران ،اساتذہ سمیت طلبہ و طالبات ،سٹاف کی ایک بہت بری تعداد موجود تھی ۔
ڈاکٹر عبدالقدیر خان نے طلبہ وطالبات سے خطاب کرتے ہوئے کہا کہ جعلی ڈگریوں کو کوئی پوچھنے ولا نہیں ۔سپریم کورٹ کسی کی ڈگری جعلی قرار دیتی ہے وہ دوبار ہ پیلے سے زیادہ ووٹوں سے منتخب ہو جاتا ہے ۔ایک فیصد حکمران ٹولہ نے 99فیصد عوام کو یر غمال بنایا ہوا ہے ۔اسلام آباد میں چور ڈاکو بیٹھے ہوئے ہیں جو پیرس کے سوٹ پہنتے ہیں 15،15گاڑیوں کے ساتھ گھومتے ہیں ۔ایماندار قیادت کی ضرورت ہے ایک اچھا شخص بھی تبدیلی لا سکتا ہے ۔پوری قوم سدھر سکتی ہے ۔ڈاکٹر عبدالقدیر خان نے کہا جیسے شہاب الدین غوری نے پرتھوی اور ہندوؤں کا سر کچلا تھا ایسے ہی جب انڈیا نے پرتھوی میزائل کا تجربہ کیا
تو ہم اس کے مقابلے میں غوری میزائل داغے ۔میزائل کے تجربوں کے دوران اس وقت میں نے نواز شریف سے کہا تھا کہ اس میزائل کا نام صرف غوری ہی ہو گا۔انہوں نے کہا کہ یہاں اتنی بے روز گاری ہے کہ کسی کوئی مداری ولا تماشہ لگا لے تو سینکڑوں لوگ جمع ہو جاتے ہیں وینا ملک بھی مینار پاکستان پر50،60ہزار افراد اکٹھے کر سکی ہے ۔انہوں نے کہا ووٹ اچھے افراد کو کاسٹ کریں ۔متوالوں جیالوں کے بجائے سوچ سمجھ کور ووٹ کاسٹ کریں ۔ڈاکٹر عبدالقدیر خان نے کہا کہ انہیں یہاں سپیرئیر یونیورسٹی میں آکر خوشگوار حیر ت ہوئی کہ ان کے پرانے ساتھی سپیر ئیر یونیورسٹی کے ریکٹر ہے ۔
سپیر ئیر یونیورسٹی اور اس کی انتظامیہ مبارکباد کی مستحق ہے کہ وہ فروغ تعلیم کے لیے اپنی خدمات پیش کر رہی ہے ۔اس سے قبل رکٹر یونیورسٹی ڈاکٹر ظفر اقبال نے طلبہ سے خطاب کرتے ہوئے کہا کہ ڈاکٹر عبدالقدیر نہ صرف ایٹمی سائنس دان اور محسن پاکستان ہیں بلکہ شریف النفس مسلمان ہیں ،بہت اچھے منتظم ہیں ۔ان کے ساتھ کام کرنے کا موقع ملا ۔یہ میر ی خوش قسمتی ہے ۔وہ رفاہ عامہ کے کام میں بھی خصوصی دلچسپی لیتے ہیں ۔ڈاکٹر قدیر ملک کا قیمتی سرمایہ ہیں ۔اللہ تعالی ان کو اپنی حفظ و امان میں رکھے صحت و سلامتی دے ۔انہوں نے کہا کہ یہ ہمارے لیے اعزاز کی بات ہے کہ ڈاکٹر قدیر نے سپیرئیر یونیورسٹی میں طلبہ سے خطاب کیا اور نوجوانوں نے اپنے قومی ہیرو کو براہ راست دیکھا۔
انہوں نے اس موقع پر سپیرئیر یونیورسٹی خواب سے تعبیر تک کا مختصر احوال بھی پیش کیا ۔انہوں نے کہا کہ سپیرئیر یونیورسٹی کو اس مقام تک پہنچانے میں چیئر مین سپیر ئیر گروپ آف کالجز چودھری عبدالرحمن کی خدمات ناقابل فراموش ہیں اور اس کا کریڈٹ ان کو جاتا ہے ۔پروفیسر عبدالخالق نے خطاب کرتے ہوئے کہا کہ سپیرئیر گروپ آف کالجز کے لاکھوں طلبہ نہ صرف پاکستان بلکہ پوری دنیا میں میڈیکل ،انجینئرنگ ،کامرس ،اکاؤنٹینسی اور بزنس کے میدان میں ملک کا نام روشن کر رہے ہیں ۔
سربراہ شعبہ ابلاغیات سپیر ئیر یونیورسٹی پروفیسر ڈاکٹر مغیث الدین شیخ نے کہا کہ ڈاکٹر عبدالقدیر خاں کی سپیرئیر یونیورسٹی میں آمد ہمارے لئے بہت بڑا اعزاز ہے ۔پوری قوم کو ڈاکٹر قدیر پر فخر ہے ۔محسن پاکستان کے ساتھ ڈکٹیٹر نے جو سلوک کیا اس پر قوم ان سے معافی مانگتی ہے ۔اس موقع پر تحریک تحفظ پاکستان کے رہنما سید ظہیر علی گیلانی نے ایک نظم بھی پیش کی۔ | 
No comments:
Post a Comment